疫情掀起打機熱潮，就算唔係忠實機迷，都會想買返部遊戲機得閒打返幾舖機殺下時間，再加上近期Sony同Microsoft先後宣佈推出PS5同Xbox Series X，任天堂又有傳下年內會出Switch Pro，一時之間遊戲界消息炒得沸沸揚揚，但呢股遊戲熱潮搞到好多尚未入手遊戲機既人都有選擇困難症，唔知買邊部先好。如果未有概念既話，可以參考以下少少既比較：
Xbox Series X:
機能：★★★★★
Xbox Series X採用客製化八核心 Zen 2 中央處理器，圖形處理器為客製化RDNA 2 GPU，記憶體及頻寬分別是320-bit 16GB GDDR6及560 GB/s，簡單黎講可以用2K解析度+60fps玩遊戲。官方更號稱為「史上最強主機」，只要被官方最佳化既遊戲都會標上「Xbox Series X Optimized」字樣，體驗最高4K+120fps效能，不過相信第三方遊戲廠短期內都唔可以用盡佢既龐大機能；另外內建儲存為1TB NVMe SSD，除左足夠裝十幾隻大作級遊戲，仲可以享受極速讀取遊戲快感，唔洗「Load多過玩」。
遊戲：★★★☆☆
Xbox主打歐美市場，首次宣傳既遊戲陣容有《Call of Duty》、《Far Cry 6》、《刺客教條：維京紀元》等歐美系遊戲，以往都被批為「遊戲沙漠」無game好玩，未必符合港人口味，吸引力麻麻。不過今次Series X系列有向下兼容功能，換言之可以玩翻上一代Xbox One既遊戲，對於以前曾推出又未玩過既遊戲，今代入坑既都可以體驗喇！（題外話，好多人希望同為Microsoft旗下既PC既遊戲平台Steam可以裝係Xbox度玩PC遊戲今代Series X仍然係無。）
性價比：★★★★☆
官方售價為HKD$3,880，以效能硬件黎講實在對得住價格，唯一可挑剔既係遊戲種類同數量，畢竟買部機翻黎都係為打機嘛。
推薦程度：★★★☆☆
綜合黎講Xbox Series X係一部比上一代更值得買既主機，如果你對Xbox而家宣傳緊既遊戲有興趣，的確淨係睇細緻又流暢既4K畫面都值回票價，買左都唔會後悔。不過Xbox主流市場仍然係北美，一般較少香港人玩，如果同筆者一樣鐘意約埋三五知己打機聯誼既人建議睇下身邊有幾多朋友會買先再決定，以免買左返黎都係玩單機遊戲或者只能連線對戰咁就本末倒置喇！
PlayStation5:
機能：★★★★☆
Ps5緊隨Xbox其後，中央處理器採用AMD 八核心Ryzen Zen 2，圖形處理器為訂製版AMD RDNA 2，記憶體及頻寬則為16GB DDR6及448GB/s，基本上效能同Xbox Series X相距唔遠，只係略遜少少，但依然可以運行4K及60fps，值得期待；另外儲存空間同樣為SSD取代傳統HDD，遊戲讀取時間大減，以PS4版《Marvel Spiderman》為例，原本需要讀取15秒，但PS5就可以減至0.8秒，快到連去廁所時間都無埋。
遊戲：★★★★★
PS5遊戲種類豐富，兼顧日系同歐美遊戲，而且Sony握有既獨佔遊戲亦唔少，首批釋出既遊戲陣容已有獨佔多年既《Horizon Zero Dawn》及《Spiderman Miles Morales》、《BioHazard 8》等等，適合雜食系及崇尚日系遊戲既機迷。更重要既係，PS5亦有向下兼容功能，可以玩翻PS4既遊戲，繼續同朋友仔一齊屠龍、踢波都得，但官方指部分遊戲儲存資料無轉移功能，一切決定交由遊戲廠商決定，因此都仲係有少少不確定因素。
性價比：★★★☆☆
光碟版：HK$3,980 PS5 數位版：HK$3,180，單從硬件性價比黎講，PS5就相對比較遜色，但勝在多遊戲玩，整體不過不失。
推薦程度：★★★★☆
如果從未入手PS4既朋友仔，淨係自PS4開發以黎既獨佔遊戲都夠你玩大半年，PlayStore遊戲折扣又多，實在抵玩；不過如果已經有PS4，推薦程度就只有兩粒星，實在唔建議一兩年內出機，因為根據數年前PS4推出既經驗，除左要食炒，仲要少新game玩！
Switch:
機能：★★★☆☆
Switch採用中央處理器ARMv8，圖形處理器為定制版NVIDIA Tegra，硬件配置理想當然係三部之中最低，但Switch的遊戲畫面大多以奇幻同可愛風為主，避重就輕；即使係移植遊戲大部分都有進行改良調整，畫面表現絕對唔輸比現時Ps4。單以機能直接啲講，Switch其實只值一粒星，但佢作為一部半家用的手提機，除左可以拎出街，仲可以夜晚係被竇入面玩。而更重要既係Switch既Joy-con控制器可以分拆出黎朋友一齊玩，唔單單係一部手堤同家機咁簡單。
遊戲：★★★★☆
任天堂的主機一向以本家遊戲同日系遊戲為主，而Switch又特別以獨創性及遊戲性行先，如《超級瑪利歐奧德賽》、《薩爾達傳說曠野之息》等家喻戶曉既任天堂本家遊戲。另外由於Joycon既獨有設計，亦有唔少聯誼同合作類型遊戲，適合鐘意開party、同伴侶一齊玩既人，例如《超級瑪利歐派對》、《路易吉洋樓3》、《動物之森》等等。
性價比：★★★★☆
官方售價為$2,340，呢個價錢黎講可以買一部比佢效能更出色既遊戲機（PS4/Xbox One）。雖然機能稍欠、遊戲數量不足，但功能有特色、配件齊全，每每推出既遊戲都驚喜不斷，係一部可塑性高既遊戲機。
推薦程度★★★★★
如果正正因為疫情而悶得發慌既人，Switch就十分適合你地，Party game、體感遊戲（如《健身環大冒險》）正好可以解決你地既苦悶，而且便攜性一流，帶去朋友同伴侶屋企一齊玩都仲得！
最後，筆者認為買之前先要了解你自己既出發點意願同偏好既遊戲類型，如果對某隻獨佔遊戲情有獨鐘既話，咁就唔洗考慮喇，跟遊戲買主機先係首要宗旨！當然，如果預算許可，屋企又有位擺，亦可以選擇直接買哂。但相信仲考慮緊買咩遊戲機既人唔少都同筆者一樣，只係想買返部可以假期係屋企打發時間，希望呢篇文可以幫到你地啦！
發表留言