疫情一日未完，外出活動都唔多，導致留喺屋企嘅時間一日比一日多，唔知道有無人同我一樣打機既時間愈來愈長呢。日子耐咗，我就拉埋伴侶同家人黎一齊玩，將Switch現有既Party Game亦都玩得七七八八，發現原來有啲冷門既遊戲竟然出奇地好玩，但喺網絡上人氣甚低令我覺得喺有啲奇怪，所以想分享下一啲我覺得必玩嘅冷門遊戲，其中一個令我忍唔住介紹嘅係去年年中推出的《世界遊戲大全51》。
《世界遊戲大全51》集合全世界51種經典遊戲，包含桌遊、棋類、啤牌等等，甚至各種熱門運動如足球、棒球、拳擊都有收錄。乍看之下，收錄嘅都係經典遊戲，睇落十分老土，但親自玩落就好過癮，其中一個最令我著迷嘅係一款「猜顏色」嘅邏輯推理遊戲，需要從六個顏色嘅大頭針估中隱藏嘅四個，十分燒腦，消磨時間或攝時間過過癮絕對一流。基本上一個人玩嘅話，可以玩晒51種收錄咗既遊戲。
可自行調教規則 由唔識玩到變高手
特別推薦嘅係各類啤牌同棋類遊戲，有好多遊戲可能你平時根本無接觸，例如西洋棋同日本將棋，玩落先知原來好好玩，而且佢每隻遊戲都有精簡又易明嘅解說，新手都輕鬆上手，絕對唔怕唔識玩。而最緊要嘅係每隻遊戲可以自行調教規則，新手可以關閉全部額外規則，只玩基本規則由淺入深慢慢上手。例如飛行棋可以選擇擲三次或一次骰仔先，唔怕擲一次玩到完都未擲到六去「起機」，或者允許「堵棋」唔比其他人超越自己，更添戰術性。
相聚遊玩方便面連 排列遊玩新奇有趣
除咗單人遊玩，遊戲都支持多人遊玩（2-4人）、相聚遊玩同埋線上對戰，要注意嘅係，有部分遊戲唔可以多人用一部機玩晒，畢竟打麻將、打啤牌都唔可能將一個畫面分成幾個比人睇哂啲牌。不過其中「相聚遊玩」可以同朋友面對面連機，只需每人帶一部機出街就可以玩晒咁多款遊戲，十分豐富又方便；而「排列遊玩」更係突破機能限制，可以將二至四部機拍埋一齊玩，擴充遊戲場景同可視畫面，不過呢個功能可以應用嘅遊戲唔多，算係雞肋，最能發揮嘅係遙控賽車，可以接駁產生出唔同樣嘅賽道。
觸控模式更添臨場感 考技術考反應
當中，呢款《世界遊戲大全51》最為有趣的是「觸控模式」，只要將Joy-con拎走，將螢幕轉一轉，Switch機身就搖身一變成為一個縮小版的萬能遊戲盒，秒變成棋盤，甚至係氣墊球臺都得。對戰唔再係鬥禁手掣，而係運用你喺現實嘅力量、技術、智慧將你嘅朋友壓倒勝出，呢種滿足感很是痛快，筆者強烈建議買咗嘅朋友試一試呢個「觸控模式」玩捉棋同氣墊球，絕對可以同朋友伴侶玩得不亦樂乎，算係《世界遊戲大全51》嘅一大賣點。另外，喺「觸控模式」之中如果你有咩不滿，都可以隨時物理式「反枱」，賴帳重新再玩！
《世界遊戲大全51》介紹影片：
發表留言